پاکستان نے اسرائیل کی جانب سے صومالی لینڈ کو آزاد اور خودمختار ریاست تسلیم کرنے کے اعلان کو مسترد کرتے ہوئے فلسطینی عوام کی کسی بھی بے دخلی کی کوشش کو ناقابلِ قبول قرار دے دیا ہے۔
صومالی لینڈ کو ملک تسلیم کرنے کے اسرائیلی اقدام پر اقوام متحدہ کی سلامتی کونسل کا ہنگامی اجلاس منعقد ہوا، جس سے خطاب کرتے ہوئے پاکستانی نائب مندوب عثمان جدون نے اسرائیلی اعلان کو سختی سے رد کر دیا۔
عثمان جدون نے سلامتی کونسل کو آگاہ کیا کہ اسرائیل غزہ سے فلسطینیوں کو بے دخل کر کے صومالی لینڈ منتقل کرنے کی کوشش کر رہا ہے جو نہ صرف غیر انسانی بلکہ بین الاقوامی قوانین کی صریح خلاف ورزی ہے۔ انہوں نے واضح کیا کہ پاکستان فلسطینی عوام کی زبردستی بے دخلی کی کسی بھی کوشش کو مکمل طور پر مسترد کرتا ہے۔
پاکستانی نائب مندوب نے عالمی برادری پر زور دیا کہ فلسطین کا مسئلہ اقوام متحدہ کی قراردادوں کے مطابق دو ریاستی حل کے ذریعے حل کیا جائے۔ انہوں نے کہا کہ صومالیہ کی حکومت ملک میں استحکام کے لیے اقدامات کر رہی ہے، تاہم اسرائیلی رویہ غیر ذمہ دارانہ ہے اور خطے میں عدم استحکام پیدا کرنے کے مترادف ہے۔
عثمان جدون نے اس موقع پر صومالیہ کی خودمختاری اور علاقائی سالمیت کی مکمل حمایت کا اعادہ کرتے ہوئے کہا کہ اسرائیلی اقدام عالمی قوانین کی کھلی خلاف ورزی ہے۔ واضح رہے کہ اسرائیل کے اس اعلان کو تمام مسلم ممالک نے مسترد کرتے ہوئے اس پر شدید تشویش کا اظہار کیا ہے۔