کراچی چیمبر آف کامرس اینڈ انڈسٹری کے صدر محمد ریحان حنیف نے ملک بھر میں گڈز ٹرانسپورٹرز اور آئل ٹینکرز کی جاری ہڑتال پر گہری تشویش کا اظہار کرتے ہوئے خبردار کیا ہے کہ مال بردار گاڑیوں کی نقل و حرکت مسلسل معطل رہنے سے صنعتی پیداوار، سپلائی چین، برآمدات اور مجموعی معاشی سرگرمیاں شدید متاثر ہوسکتی ہیں۔
پیر کے روز جاری کردہ اپنے ویڈیو بیان میں صدر کے سی سی آئی ریحان حنیف نے وفاقی حکومت اور تمام صوبائی حکومتوں پر زور دیا کہ وہ ٹرانسپورٹ کے شعبے کے نمائندوں سے فوری طور پر اعلیٰ ترین سطح پر رابطہ کرکے انہیں مذاکرات میں شامل کریں، ان کے جائز اور حقیقی مسائل سنیں اور بامعنی مذاکرات کے ذریعے ان کے زیرِ التوا مسائل کو مزید کسی تاخیر کے بغیر حل کیا جائے۔ انہوں نے کہا کہ صورتحال فوری حکومتی مداخلت کا تقاضا کرتی ہے۔
صدر کے سی سی آئی نے نشاندہی کی کہ ٹرانسپورٹ کا شعبہ پاکستان کی مکمل سپلائی چین میں ریڑھ کی ہڈی کی حیثیت رکھتا ہے جو بندرگاہوں، صنعتوں، مارکیٹوں اور صارفین کے درمیان رابطے کا اہم ذریعہ ہے۔ اشیاء اور پٹرولیم مصنوعات کی نقل و حرکت میں طویل تعطل کے نتیجے میں صنعتی پیداوار، خام مال کی دستیابی، تیار مصنوعات کی ترسیل، ایندھن کی فراہمی، ملکی تجارت اور برآمدی سامان کی بروقت ترسیل پر نہایت منفی اثرات مرتب ہوسکتے ہیں۔
انہوں نے خبردار کیا کہ ایسے وقت میں جب پاکستان کی برآمدی صنعت پہلے ہی متعدد معاشی اور انتظامی مشکلات سے دوچار ہے، وہ مزید کسی رکاوٹ کی متحمل نہیں ہوسکتی۔ تاہم انہوں نے ٹرانسپورٹ برادری سے بھی اپیل کی کہ وہ لچک کا مظاہرہ کرتے ہوئے وسیع تر قومی مفاد کو مدنظر رکھیں۔