وفاقی وزیر داخلہ محسن نقوی نے واضح کیا ہے کہ خوارجی عناصر کے خلاف کسی قسم کی رعایت نہیں برتی جائے گی اور خیبرپختونخوا میں امن و امان کا قیام وفاقی حکومت کی اولین ترجیح ہے۔
وفاقی وزیر داخلہ سے گورنر خیبرپختونخوا فیصل کریم کنڈی نے ملاقات کی، جس میں صوبے کی مجموعی امن و امان کی صورتحال پر تفصیلی تبادلہ خیال کیا گیا۔ ملاقات کے دوران خیبرپختونخوا کو درپیش سیکیورٹی چیلنجز، بالخصوص سرحدی علاقوں میں سیکیورٹی اقدامات اور خوارجیوں کے خلاف جاری آپریشنز پر گفتگو کی گئی۔
محسن نقوی نے صوبے میں امن و استحکام کے لیے ہر ممکن تعاون کی یقین دہانی کراتے ہوئے کہا کہ وفاقی حکومت خیبرپختونخوا کو درپیش سیکیورٹی مسائل کے حل کے لیے مکمل سپورٹ فراہم کرے گی۔ انہوں نے دہشتگردی کے خلاف جنگ میں خیبرپختونخوا کے عوام کی قربانیوں کو خراجِ تحسین پیش کیا۔
وفاقی وزیر داخلہ کا کہنا تھا کہ فتنہ الخوارج اور ان کے سہولت کاروں کے خاتمے کے لیے مشترکہ اقدامات جاری ہیں اور دہشتگرد عناصر کے خلاف زیرو ٹالرنس پالیسی پر عمل کیا جا رہا ہے۔
اس موقع پر گورنر خیبرپختونخوا فیصل کریم کنڈی نے کہا کہ صوبے میں امن و امان کے قیام کے لیے وفاقی تعاون نہایت ضروری ہے اور دہشت گردی کے مکمل خاتمے کے لیے مربوط اور مشترکہ حکمتِ عملی اپنانا ہوگی۔