سوئٹزرلینڈ کے ایک مشہور اسکی ریزورٹ ٹاؤن کے بار میں نیو ائیر نائٹ کے موقع پر آتشزدگی کے حادثے میں کم از کم 47 افراد ہلاک اور 115 زخمی ہو گئے ہیں۔ غیر ملکی میڈیا کے مطابق یہ واقعہ سال نو کی تقریبات کے دوران پیش آیا اور متاثرین میں غیر ملکی بھی شامل ہیں۔ فرانسیسی وزارت خارجہ نے بتایا کہ حادثے میں 8 فرانسیسی شہری لاپتہ ہیں۔
ابتدائی اطلاعات کے مطابق آگ ایک ویٹر کی غلطی سے لگی اور لکڑی کے فرش کی موجودگی کے باعث تیزی سے پھیل گئی۔ زخمیوں کو فوری طور پر طبی امداد فراہم کی جا رہی ہے۔
سوئٹزرلینڈ کے صدر نے اس المناک واقعے کے بعد برن شہر میں پانچ روز تک قومی پرچم سرنگوں رکھنے کا اعلان کیا ہے۔ پاکستان کے وزیراعظم شہباز شریف نے بھی اس حادثے پر افسوس کا اظہار کرتے ہوئے کہا کہ مشکل وقت میں پاکستان سوئس حکومت اور عوام کے ساتھ کھڑا ہے۔