بھارتی ریاست راجستھان کے ضلع دھول پور میں 4 ماہ کی حاملہ 24 سالہ خاتون گڑیا کو مبینہ طور پر جہیز کے اضافی مطالبات پر اس کے سسرالیوں نے قتل کر دیا۔
پولیس کے مطابق ہفتے کے روز گڑیا کو اس کے سسرال، گاؤں انچھاپورا میں قتل کیا گیا اور سسرالیوں نے لاش کو گائے کے گوبر کے اُپلے جمع کر کے چتا بنائی اور آگ لگا دی۔ والدین کو اطلاع گڑیا کی بڑی بہن نے دی اور اہلِخانہ جب موقع پر پہنچے تو چتا ابھی جل رہی تھی۔ والدین نے آگ بجھا کر پولیس کو اطلاع دی۔
موقع پر سینئر پولیس افسران اور فارنزک ٹیم پہنچی چتا سے شواہد اکٹھے کیے گئے اور پوسٹ مارٹم کے لیے نمونے لیے گئے۔ گھر کے اندر خون کے دھبے اور کلہاڑی، پھاوڑا، لاٹھیاں سمیت دیگر ہتھیار برآمد ہوئے۔
فوری کارروائی میں پولیس نے مقتولہ کے شوہر پنکج ٹھاکر کو گرفتار کر لیا جبکہ دیگر سسرالی رشتہ دار فرار ہیں جن کی تلاش جاری ہے۔ والد دیویندر سنگھ پرمار کے مطابق گڑیا کی شادی 28 مئی 2025 کو ہوئی تھی، اور شادی کے وقت 15 لاکھ روپے نقد، موٹر سائیکل، گھریلو سامان اور زیورات دیے گئے تھے تاہم سسرالی مزید کار، سونے کی چین اور بھینس کا مطالبہ کر رہے تھے اور گڑیا کو ذہنی و جسمانی تشدد کا نشانہ بنایا جا رہا تھا۔