افغان مہاجرین کو برتھ سرٹیفیکیٹ جاری کرنے کے الزامات میں ملوث 24 یونین اور ویلج کونسل سیکریٹریز کے خلاف محکمانہ تحقیقات مکمل کر کے انہیں ملازمت سے برخاست کرنے کی سفارشات صوبائی حکومت کو ارسال کردی گئی ہیں۔
ابتدائی مرحلے میں تمام 24 سیکریٹریز کو معطل کرنے کا فیصلہ کیا گیا ہے جبکہ اس معاملے میں ملوث بلدیاتی نمائندوں کو نااہل قرار دینے کی بھی تیاری مکمل کرلی گئی ہے۔
ذرائع کے مطابق پہلے مرحلے میں گزشتہ روز ایک یونین کونسل سیکریٹری کو ملازمت سے برخاست کر دیا گیا ہے جبکہ ایک ہزار سے زائد ایسے برتھ سرٹیفیکیٹس کی بنیاد پر بننے والے قومی شناختی کارڈز کو منسوخ کرنے کا عمل ممکنہ طور پر آئندہ ہفتے سے شروع کیا جا رہا ہے۔
سرکاری ذرائع کا کہنا ہے کہ مختلف نجی اور سرکاری اسکولوں سے بھی ان طلبہ کی تفصیلات طلب کر لی گئی ہیں جنہوں نے انہی متنازعہ برتھ سرٹیفکیٹ کی بنیاد پر تعلیمی اداروں میں داخلہ حاصل کیا تھا۔
ذرائع کے مطابق بعض افغان مہاجرین رضاکارانہ طور پر افغانستان واپس جا چکے ہیں، کچھ کو ڈی پورٹ کیا گیا ہے جبکہ چند افراد جیلوں میں بھی ہیں، تاہم اس کے باوجود ان کے برتھ سرٹیفکیٹ شہر کی مختلف یونین کونسلوں اور ویلج کونسلوں سے جاری ہوئے۔ تحقیقات میں یہ بات بھی سامنے آئی ہے کہ اس پورے عمل میں بعض بلدیاتی نمائندے براہ راست ملوث رہے۔