وزیر داخلہ سندھ ضیا لنجار نے پاکستان تحریک انصاف کو شہر کی کسی سڑک پر جلسہ کی صورت میں حکومتِ سندھ کی جانب سے سخت ایکشن لیے جانے سے متعلق خبردار کیا ہے۔
نجی ٹی وی سے گفتگو کرتے ہوئے ضیا لنجار نے کہا کہ پی ٹی آئی کے ساتھ شاید کراچی کے عوام نہیں ہیں اس لیے وہ میدان کے بجائے روڈ پر جلسہ کرنا چاہتی ہے۔
انہوں نے کہا اجازت ملنے کے باوجود جلسہ گاہ چھوڑ کر 'روڈ شو' کرنے کا اصرار بہانے بازی ہے، گراؤنڈ سے باہر جلسے کی اجازت نہیں ملے گی، کسی بھی سڑک پر جلسہ ہوگا تو حکومتِ سندھ سخت ایکشن لے گی، سندھ حکومت نے پی ٹی آئی کو جہاں جلسےکی اجازت دی وہیں جلسہ کرے۔
وزیر داخلہ سندھ نے مزید کہا کہ حکومت کی رٹ کو چیلنج کرنے کی ہر گز اجازت نہیں دی جائےگی۔ ٹکراؤ کی صورت میں نتائج بھگتنا ہوں گے اور قانون کی خلاف ورزی پر جلسے کا اجازت نامہ بھی منسوخ ہوگا۔
واضح رہے کہ ڈپٹی کمشنر ایسٹ نے پاکستان تحریک انصاف کو باغ جناح میں جلسے کی اجازت دے دی ہے تاہم پی ٹی آئی نے مزار قائد کے گیٹ پر جلسے کا اعلان کر رکھا ہے۔