ایران کے صدر مسعود پزشکیان نے کہا ہے کہ امریکا اور اسرائیل مذموم مقاصد کیلیے ایران میں فسادات کرا رہے ہیں۔
ایرانی میڈیا سے گفتگو میں مسعود پزشکیان کا کہنا تھاکہ امریکا اور اسرائیل ایران میں افراتفری اور بےامنی پھیلانا چاہتے ہیں۔ ایرانی عوام فسادیوں اوردہشت گردوں سےخود کو دور رکھیں۔
ایرانی صدر کا کہنا تھاکہ عوام فسادیوں کو انتشار پھیلانےکی اجازت نہ دیں، ایرانی عوام کو یقین رکھنا چاہیے کہ ہم انصاف قائم کرنا چاہتےہیں۔
دوسری جانب ایرانی صدرکے قوم سےخطاب پر ایرانی سفارتخانے نے خطاب کے نکات جاری کردیے جس کے مطابق صدرمسعود پزشکیان نےکہا ہے کہ حکومت مسائل حل، عوامی مشکلات کم کرنے کی کوشش کررہی ہے لیکن کسی غیر ملکی کو قوم میں انتشار کے بیج بونے کی اجازت نہیں دیں گے۔
ایرانی سفارتخانے نے بتایا کہ ایرانی صدر نے عوام کی زندگیوں میں بہتری لانے کیلیے ہر ممکن کوشش کرنے کا وعدہ کیا اور تمام طبقہ ہائے فکر کو فسادات کے خلاف کھڑے ہونے کی دعوت دی۔
صدر پزشکیان نے کہا کہ امریکی صدر کو وینزویلا، غزہ اور دیگر مقامات پر کیے اقدامات پر شرم آنی چاہیے۔
صدر پزشکیان نے ایرانی عوام سے ملکی مسائل کےحل کیلیے متحد ہونے کی اپیل کی اور کہا کہ کوئی شہری بےامنی نہ پھیلائے اور کوئی انسان دوسرے انسان کو قتل نہ کرے، حکومت بدعنوانی کی جڑوں کے خلاف کارروائی کررہی ہے۔
یاد رہے کہ ایران میں احتجاجی مظاہروں کا 14 واں روز جاری ہے اور ایرانی انسانی حقوق تنظیم کے دعوے کے مطابق دو ہفتے سے جاری مظاہروں میں 192 افراد ہلاک ہوئے ہیں۔