وزیراعظم محمد شہباز شریف کی زیر صدارت پاکستان ریلویز کی کارکردگی کو مزید مؤثر اور منافع بخش بنانے کے لیے نجی شعبے کے ماہرین کے ساتھ ایک اہم مشاورتی اجلاس منعقد ہوا۔ اجلاس میں پاکستان ریلویز کے ادارہ جاتی، انتظامی اور کمرشل ڈھانچے میں انقلابی اصلاحات پر تفصیلی غور کیا گیا۔
وزیراعظم نے کہا کہ ملکی معیشت کی مجموعی ترقی، صنعت و تجارت کے فروغ اور سرمایہ کاری میں اضافے کے لیے نجی شعبے کے ماہرین سے مشاورت حکومت کی معاشی اصلاحات کا بنیادی حصہ ہے۔ انہوں نے قلیل وسائل کے باوجود مؤثر کارکردگی پر وفاقی وزیر ریلوے اور ان کی ٹیم کو خراجِ تحسین پیش کیا۔
وزیراعظم کا کہنا تھا کہ پاکستان ریلویز میں دہائیوں سے ادارہ جاتی اور انتظامی اصلاحات ناگزیر تھیں، جن پر موجودہ حکومت عمل پیرا ہے۔ جاری اصلاحات کے نتیجے میں ریلویز کو ایک منافع بخش ادارہ بنا کر ملکی صنعت، تجارت اور سرمایہ کاروں کے لیے سہولت کار بنایا جا سکتا ہے۔
انہوں نے خصوصی ہدایت دی کہ پاکستان ریلویز تمام متعلقہ اداروں اور اکائیوں سے بامعنی مشاورت کے بعد عملی اقدامات پر مشتمل جامع روڈ میپ آئندہ ہفتے پیش کرے۔
وزیراعظم نے اس امر پر افسوس کا اظہار کیا کہ ماضی میں ریلویز کے ترقیاتی منصوبوں کے لیے حکومتی فنڈز کو مسلسل نظر انداز کیا گیا، تاہم اعلان کیا کہ آئندہ مالی سال کے PSDP میں ریلویز کے منصوبوں کو متناسب بجٹ دیا جائے گا۔
وزیراعظم نے پاکستان ریلویز کو عالمی معیار کے کمرشل اور مواصلاتی نظام کا حصہ بنانے، ریلوے انفراسٹرکچر کے منافع بخش کمرشل استعمال اور پبلک پرائیویٹ پارٹنرشپ کے امکانات کا بھرپور جائزہ لینے کی بھی ہدایت دی۔ ان کا کہنا تھا کہ معیاری ریلوے نظام نہ صرف اندرون ملک بلکہ علاقائی صنعت و تجارت اور تعاون میں بھی کلیدی کردار ادا کر سکتا ہے۔
اجلاس میں شریک نجی شعبے کے ماہرین نے پاکستان ریلویز کی کارکردگی مزید بہتر بنانے اور کمرشل استعمال سے متعلق مختلف سفارشات پیش کیں، جن پر وزیراعظم نے اظہارِ تشکر کیا۔
اجلاس میں وفاقی وزیر ریلوے محمد حنیف عباسی، وفاقی وزیر خزانہ محمد اورنگزیب، وفاقی وزیر اطلاعات و نشریات عطاء اللہ تارڑ، وفاقی وزیر موسمیاتی تبدیلی مصدق ملک، وفاقی وزیر اقتصادی امور احد خان چیمہ، وزیراعظم کے معاون خصوصی ہارون اختر، نیشنل کوآرڈینیٹر ایس آئی ایف سی لیفٹیننٹ جنرل (ر) سرفراز احمد، متعلقہ وزارتوں کے سیکریٹریز، اعلیٰ سرکاری حکام اور نجی شعبے کے ماہرین زید بشیر، پیر سعد احسان الدین سمیت دیگر نے شرکت کی۔