الیکشن کمیشن نے اثاثوں کی تفصیلات جمع نہ کرانے والے اراکین اسمبلی کی رکنیت معطل کردی ہے۔ قومی اسمبلی کے 32 ارکان، پنجاب اسمبلی کے 50 اور سندھ اسمبلی کے 33 ارکان کی رکنیت معطل کی گئی ہے۔
معطل ہونے والے قومی اسمبلی کے اراکین میں وفاقی وزیر خالد مقبول صدیقی، سید علی موسیٰ گیلانی اور سید عبدالقادر گیلانی شامل ہیں۔
پنجاب اسمبلی میں رانا سکندر حیات، عدنان ڈوگر، عامر حیات ہراج جبکہ سندھ اسمبلی میں صوبائی وزیر سعید غنی کی رکنیت بھی معطل کی گئی ہے۔
الیکشن کمیشن کے اس اقدام کے بعد اثاثوں کی تفصیلات جمع نہ کرانے والے ارکان کے گرد قانونی اور پارلیمانی دائرے میں گھیرا مزید تنگ ہوگیا ہے۔
الیکشن کمیشن نے اراکین کو 15 جنوری تک گوشوارے جمع کروانے کی آخری مہلت دی تھی، لیکن مقررہ مدت ختم ہونے تک گوشوارے جمع نہ کروانے پر یہ کارروائی کی گئی۔
الیکشن کمیشن نے واضح کیا ہے کہ گوشوارے جمع نہ کروانے تک اراکین اسمبلی میں اپنے حقوق استعمال نہیں کر سکیں گے، اور وہ کسی قانونی یا پارلیمانی کارروائی میں حصہ نہیں لے سکیں گے۔