لاہور میں سابق قومی کرکٹر عبدالقادر کے بیٹے سلمان قادر کو پولیس نے ملازمہ سے زیادتی کے الزام میں گرفتار کرلیا۔
لاہور کے علاقے برکی میں ماضی کے نامور لیگ اسپنر عبدالقادر کے بیٹے سلمان قادر کے خلاف گھریلو ملازمہ نے زیادتی کا مقدمہ درج کرایا ہے۔
متاثرہ لڑکی نے تھانہ برکی میں درج ایف آئی آر میں مؤقف اختیار کیا ہے کہ سلمان قادر اسے گاڑی میں بٹھا کر اپنے فارم ہاؤس لے گیا، جہاں اس نے زبردستی جنسی زیادتی کی۔
پولیس کے مطابق مقدمہ درج ہونے کے بعد فوری کارروائی کرتے ہوئے ملزم سلمان قادر کو گرفتار کرلیا گیا ہے۔ واقعے کی تفتیش جاری ہے اور قانونی کارروائی عمل میں لائی جا رہی ہے۔
یاد رہے کہ سلمان قادر ڈومیسٹک کرکٹ میں 26 فرسٹ کلاسز میچز اور 40 ون ڈے میچز کھیل چکا ہے۔