چونیاں میں فصل میں داخل ہونے پر بھینس پر مبینہ تشدد، ٹانگیں کاٹ دی گئیں، ملزم گرفتار

image

پنجاب کے علاقے چونیاں میں فصل میں داخل ہونے پر مبینہ طور پر ایک بھینس پر بہیمانہ تشدد کرتے ہوئے اس کی ٹانگیں کاٹ دی گئیں، پولیس نے واقعے میں ملوث ملزم کو گرفتار کرلیا۔

تھانہ سٹی چونیاں کی حدود کوٹ گاماں میں راستے سے گزرتے ہوئے ایک بھینس مبینہ طور پر محمد خوشی کی فصل میں داخل ہوگئی، جس پر بھینس کے مالک محمد طارق نے الزام عائد کیا ہے کہ بااثر افراد نے طیش میں آکر بے زبان جانور کو تشدد کا نشانہ بنایا اور اس کی ٹانگیں کاٹ دیں۔

پولیس کو دی گئی درخواست کے مطابق افسوسناک واقعہ 19 نومبر کی رات 11 سے 12 بجے کے درمیان پیش آیا۔ واقعے کے بعد اہل علاقہ میں شدید غم و غصہ پایا جاتا ہے۔

ایس ایچ او تھانہ سٹی چونیاں صابر چھینہ کے مطابق واقعے میں ملوث ملزم کو گرفتار کرلیا گیا ہے جبکہ مزید تفتیش اور قانونی کارروائی جاری ہے۔


Meta Urdu News: This news section is a part of the largest Urdu News aggregator that provides access to over 15 leading sources of Urdu News and search facility of archived news since 2008.

Follow US