وفاقی وزیر داخلہ محسن نقوی نے اوورسیز پاکستانیوں کی جائیدادوں پر قبضے کے خلاف سخت ہدایات جاری کرتے ہوئے کہا ہے کہ وفاقی دارالحکومت میں اوورسیز پاکستانیوں کی جائیداد سے متعلق کسی بھی شکایت پر ڈپٹی کمشنر اسلام آباد 7 روز کے اندر فیصلہ کرنے کا پابند ہوگا۔
محسن نقوی نے سماجی رابطے کی سائٹ ایکس پر پیغام میں کہا کہ اسلام آباد میں اوورسیز پاکستانیوں کی سرمایہ کاری خوش آئند اور قابل قدر ہے، حکومت ان کے اثاثوں کے تحفظ کے لیے فوری اور شفاف کارروائی کو یقینی بنائے گی۔
محسن نقوی کا کہنا تھا کہ اوورسیز پاکستانیوں کی جائیداد کے حقوق کا مکمل تحفظ کیا جائے گا اور ان کی جائیداد پر کسی بھی قسم کے قبضے کی اجازت نہیں دی جائے گی۔ انہوں نے واضح کیا کہ اوورسیز پاکستانیوں کو درپیش مسائل کے حل میں کسی قسم کی تاخیر برداشت نہیں کی جائے گی۔