لاہور ہائیکورٹ نے گلوکار علی ظفر کی جانب سے گلوکارہ میشا شفیع کے خلاف دائر 100 کروڑ روپے کے ہتکِ عزت کیس میں اہم فیصلہ سناتے ہوئے میشا شفیع کی جانب سے ٹرائل کورٹ کے فیصلے کے خلاف دائر درخواست خارج کر دی۔
جسٹس احمد ندیم ارشد نے تحریری فیصلہ جاری کرتے ہوئے کہا کہ ٹرائل کورٹ کا فیصلہ قانون کے عین مطابق ہے اور میشا شفیع کی سوشل میڈیا پر بیان بازی پر عائد پابندی درست ہے۔ عدالت نے اپنے فیصلے میں واضح کیا کہ اس پابندی میں کوئی قانونی سقم موجود نہیں اور اس میں کسی قسم کی خلاف ورزی نہیں پائی جاتی۔
ماہرین کے مطابق لاہور ہائیکورٹ کا یہ فیصلہ ہتکِ عزت کے قوانین کے نفاذ اور سوشل میڈیا پر نامناسب بیانات پر قانونی کارروائی کے حوالے سے ایک اہم پیش رفت ہے جس سے آئندہ ایسے مقدمات میں رہنمائی حاصل ہو گی۔