اسپیکر پنجاب اسمبلی ملک احمد خان کا کہنا ہے کہ بسنت پنجاب کی ثقافت کا ایک اہم حصہ ہے فیسٹیول کو دوبارہ متعارف کرانے کا کریڈٹ وزیر اعلیٰ پنجاب کو جاتا ہے۔
لاہور میں میڈیا سے گفتگو کرتے ہوئے اسپیکر پنجاب اسمبلی نے کہا کہ موجودہ حالات میں جب ہر طرف پریشانی اور دباؤ پایا جاتا ہے ایسے میں اس نوعیت کے ثقافتی فیسٹیولز عوام کے لیے نہایت مفید ثابت ہوتے ہیں۔ انہوں نے کہا کہ لاہور جیسے تاریخی شہر میں اس فیسٹیول کا انعقاد خوش آئند ہے اور امید ہے شہری اسے بھرپور انداز میں منائیں گے۔
ملک احمد خان نے شہریوں پر زور دیا کہ وہ فیسٹیول کو خوش دلی سے منائیں مگر اس دوران ذمہ داری کا مظاہرہ بھی کریں تاکہ کسی قسم کا نقصان نہ ہو۔ انہوں نے کہا کہ اس فیسٹول میں کسی قسم کا کوئی رنگ غالب نہ آنے دیں۔
اسپیکر پنجاب اسمبلی نے کہا کہ فیسٹیول کے باعث لاہور میں ہوٹل اور کاروبار عروج پر ہیں اور شہر کے بیشتر ہوٹل مکمل طور پر بک ہو چکے ہیں جو معیشت کے لیے مثبت اشارہ ہے۔