امریکا نے ایران کے مطالبے پر مذاکرات کے مقام میں تبدیلی سے اتفاق کر لیا ہے۔ اس فیصلے کے بعد امریکا اور ایران کے درمیان مجوزہ مذاکرات اب ترکی کے استنبول کے بجائے عمان میں ہوں گے۔
غیر ملکی خبر رساں ادارے کے مطابق ایران نے امریکا سے رابطہ کر کے مذاکرات کے لیے ترکی، عمان اور قطر کے وزرائے خارجہ سے مشاورت کی تھی اور استنبول کے بجائے عمان میں مذاکرات کرانے کی درخواست کی تھی، جسے امریکی انتظامیہ نے قبول کر لیا۔
اطلاعات کے مطابق امریکا اور ایران کے درمیان مذاکرات جمعہ کو ممکنہ طور پر عمان میں منعقد ہوں گے۔
ایرانی وزیر خارجہ نے واضح کیا ہے کہ ایران امریکا سے صرف دوطرفہ مذاکرات کا خواہاں ہے اور کسی تیسرے فریق کی شمولیت نہیں چاہتا۔
ذرائع کے مطابق مذاکرات کے مقام کی تبدیلی کو سفارتی پیش رفت قرار دیا جا رہا ہے اور خطے میں اس عمل کو اہم سیاسی پیش رفت کے طور پر دیکھا جا رہا ہے۔