حکومت نے اپوزیشن سے مذاکراتی عمل کی بحالی کیلیے صدر مملکت آصف علی زرداری کو بھی اعتماد میں لینے کا فیصلہ کرلیا ہے۔
ذرائع کے مطابق وزیراعظم شہباز شریف مذاکرات شروع کرنے سے قبل صدر مملکت سے مشاورت کے خواہاں ہیں۔ ذرائع کا کہنا ہے کہ وزیراعظم شہباز شریف اور اپوزیشن لیڈر محمود خان اچکزئی کے درمیان ملاقات کیلیے رابطہ کاری رانا ثناء اللہ کررہے ہیں۔ تاہم صدر آصف علی زرداری کے دورہ کراچی کے باعث وزیراعظم سے ملاقات نہ ہوسکی۔
ذرائع کے مطابق صدر مملکت کے قازقستان کے دورے اور وزیراعظم شہباز شریف کی مصروفیات کے باعث بھی ملاقات میں تاخیر ہوئی۔ اب امکان ہے کہ وزیراعظم شہباز شریف اور محمود خان اچکزئی کی ملاقات پارلیمنٹ ہاؤس میں ہوگی۔
ذرائع کا مزید کہنا ہے کہ قومی اسمبلی اجلاس کے دوران وزیراعظم اپوزیشن قیادت سے ملاقات کریں گے، جس میں سیاسی صورتحال اور مذاکراتی عمل پر تبادلہ خیال کیا جائے گا۔