گلوبل صمود فلوٹیلا نے آئندہ ماہ غزہ کی ناکہ بندی توڑنے کی ایک اور کوشش کا اعلان کر دیا ہے۔ فلوٹیلا کے منتظمین کے مطابق وہ غزہ کے محصور فلسطینیوں کی انسانی بنیادوں پر مدد کے لیے پرعزم ہیں۔
منتظمین کا کہنا ہے کہ اس بار 100 کشتیاں اور ایک ہزار سے زائد امدادی کارکن اس مشن میں حصہ لیں گے۔ قافلے میں طبی عملہ اور جنگی جرائم کی تفتیش کرنے والے ماہرین بھی شامل ہوں گے جو غزہ میں جاری انسانی بحران اور مبینہ جرائم کا جائزہ لیں گے۔
اعلامیے کے مطابق فلوٹیلا مارچ میں اپنے سفر کا آغاز کرے گی اور غزہ تک رسائی کی کوشش کی جائے گی۔ منتظمین نے کہا ہے کہ تمام سرگرمیاں بین الاقوامی قوانین اور انسانی ہمدردی کے اصولوں کے تحت انجام دی جائیں گی۔
واضح رہے کہ گزشتہ سال اکتوبر میں اسرائیل نے غزہ جانے والی امدادی فلوٹیلا کو روک دیا تھا جس کے دوران 40 کشتیاں اور 450 امدادی کارکنوں کو حراست میں لے لیا گیا تھا، جس کے باعث امدادی سامان غزہ پہنچنے میں ناکام رہا تھا۔