ازبکستان کے صدر شوکت مرزیایوف نے اپنے اعلیٰ سطح کے وزارتی وفد کے ہمراہ پاکستان کے سرکاری دورے کے دوران گلوبل انڈسٹریل اینڈ ڈیفنس سلوشنز (GIDS) کا دورہ کیا۔ فیلڈ مارشل سید عاصم منیر، نشانِ امتیاز (ملٹری)، ہلالِ جرأت، چیف آف آرمی اسٹاف و چیف آف ڈیفنس اسٹاف نے معزز مہمان کا پرتپاک استقبال کیا اور انہیں ادارے کے مختلف حصوں کا دورہ کرایا۔
دورے کے دوران صدرِ ازبکستان کو جی آئی ڈی ایس کے متنوع دفاعی و صنعتی پورٹ فولیو، جدید دفاعی مصنوعات، صنعتی صلاحیتوں اور ٹیکنالوجی میں پیش رفت سے آگاہ کیا گیا۔ وفد نے مختلف دفاعی مصنوعات کا مشاہدہ کیا جو پاکستان کی مقامی دفاعی پیداوار اور صنعتی ترقی کی عکاسی کرتی ہیں۔
اس موقع پر دونوں ممالک کے مابین دفاع، ٹیکنالوجی اور صنعتی شعبوں میں تعاون کو فروغ دینے پر اتفاق کیا گیا۔ فریقین نے شراکت داری، علم کے تبادلے اور مشترکہ منصوبوں کی اہمیت پر زور دیا۔
یہ دورہ پاکستان اور ازبکستان کے درمیان دوطرفہ تعلقات کو مزید مستحکم بنانے اور باہمی تعاون کے نئے مواقع تلاش کرنے کی جانب ایک اہم پیش رفت قرار دیا جا رہا ہے۔