لاہور میں بسنت کے موقع پر افسوسناک حادثہ پیش آیا جہاں معروف صحافی زین ملک پتنگ بازی کے دوران چھت سے گر کر جاں بحق ہو گئے۔
تفصیلات کے مطابق گلشنِ راوی کے رہائشی صحافی زین ملک بسنت کے تیسرے روز پتنگ اڑا رہے تھے کہ اچانک توازن بگڑنے کے باعث چھت سے نیچے گر گئے۔ انہیں فوری طور پر طبی امداد کے لیے قریبی اسپتال منتقل کیا گیا تاہم وہ جانبر نہ ہو سکے۔ اسپتال انتظامیہ کے مطابق زین ملک کے سر اور جسم کی ہڈیوں کو شدید چوٹیں آئیں جو جان لیوا ثابت ہوئیں۔
زین ملک مختلف ٹی وی چینلز سے وابستہ رہ چکے تھے اور لاہور پریس کلب کے کونسل ممبر بھی تھے۔ اہلخانہ کے مطابق یہ واقعہ حادثاتی تھا تاہم ان کی اچانک وفات نے صحافتی حلقوں سمیت دوست احباب کو گہرے صدمے میں مبتلا کر دیا ہے۔