کینیڈا کے صوبے برٹش کولمبیا کے علاقے ٹمبلر رج کے ایک ہائی اسکول میں فائرنگ کے افسوسناک واقعے میں مبینہ خاتون حملہ آور سمیت 10 افراد ہلاک جبکہ 27 زخمی ہوگئے۔
غیر ملکی میڈیا رپورٹس کے مطابق فائرنگ کا واقعہ اسکول کے احاطے میں پیش آیا، جہاں پولیس کو موقع سے 6 افراد کی لاشیں ملیں۔ ایک زخمی شخص اسپتال منتقل کرتے ہوئے راستے میں دم توڑ گیا۔
پولیس حکام کا کہنا ہے کہ مزید 2 افراد ایک قریبی گھر سے مردہ حالت میں پائے گئے، جن کے بارے میں خیال کیا جا رہا ہے کہ ان کا تعلق بھی اسی واقعے سے ہے۔
واقعے میں شدید زخمی ہونے والے 2 افراد کو ایئر لفٹ کے ذریعے اسپتال منتقل کیا گیا ہے جن کی حالت تشویش ناک بتائی جا رہی ہے، جبکہ مجموعی طور پر 27 زخمیوں کو طبی امداد فراہم کی گئی۔
پولیس کے مطابق مشتبہ حملہ آور ممکنہ طور پر خاتون تھی جس نے فائرنگ کے بعد مبینہ طور پر خودکشی کر لی۔ واقعے کی وجوہات جاننے کے لیے تحقیقات جاری ہیں جبکہ علاقے میں سیکیورٹی سخت کر دی گئی ہے۔