خوبصورتی صرف انسانوں تک محدود نہیں رہی بلکہ جانور بھی اب مصنوعی پروسیجرز کے ذریعے پرکشش بنائے جا رہے ہیں مگر اس کا خمیازہ کچھ اونٹوں نے عمان میں حال ہی میں ہونے والے مقابلہ حسن میں بھگتا۔
خلیجی ممالک میں اونٹ شان و شوکت اور خوبصورتی کے علامت سمجھے جاتے ہیں اور یہاں باقاعدہ اونٹوں کے مقابلہ حسن منعقد کیے جاتے ہیں۔ تاہم عمان میں منعقدہ حالیہ مقابلے میں درجنوں اونٹ اس لیے باہر کر دیے گئے کیونکہ ان کے مالکان نے انہیں خوبصورت بنانے کے لیے بوٹوکس انجکشنز اور دیگر مصنوعی پروسیجرز کروائے تھے۔
عرب میڈیا کے مطابق سالانہ مقابلہ حسن میں 20 اونٹ اسی وجہ سے حصہ لینے سے روک دیے گئے۔ یہ پابندی اس بات کی عکاسی کرتی ہے کہ اونٹوں کی اصل خوبصورتی اور قدرتی حسن کو ترجیح دی جاتی ہے اور مصنوعی طریقے استعمال کرنا مقابلے کے اصولوں کے خلاف ہے۔
واضح رہے کہ اس سے قبل سعودی عرب میں بھی اونٹوں کے مقابلہ حسن میں مصنوعی پروسیجرز کرانے والے متعدد اونٹوں کو نا اہل قرار دیا جا چکا ہے۔