بھارتی حکومت کی مبینہ ناکام سفارت کاری اور متنازع تعلیمی پالیسیوں کے باعث بیرون ملک جانے والے بھارتی طلبا کی تعداد میں نمایاں کمی ریکارڈ کی گئی ہے۔
غیر ملکی میڈیا رپورٹ کے مطابق گزشتہ تین برس میں بیرون ملک تعلیم کے لیے جانے والے بھارتی طلبا کی تعداد میں 31 فیصد تک کمی واقع ہوئی ہے۔ تین سال کے دوران یہ تعداد 9 لاکھ 8 ہزار سے کم ہو کر 6 لاکھ 26 ہزار رہ گئی ہے۔
بھارتی وزیرِ تعلیم سکانتام مجمدار نے یہ اعداد و شمار پارلیمنٹ کے ایوان بالا راجیہ سبھا میں ایک تحریری سوال کے جواب میں پیش کیے۔
ماہرین تعلیم کا کہنا ہے کہ وزیرِاعظم نریندر مودی کی پالیسیوں، سفارتی محاذ پر کشیدگی اور بعض ممالک میں بھارتی شہریوں سے متعلق خدشات کے باعث ویزا قوانین سخت کیے جا رہے ہیں، جس سے طلبا کو مشکلات کا سامنا ہے۔
ادھر امریکا کے ایچ ون ویزا پروگرام سے سب سے زیادہ فائدہ اٹھانے والے بھارتی نوجوان بھی حالیہ پابندیوں اور سخت پالیسیوں کے باعث غیر یقینی صورتحال سے دوچار ہیں، جس نے بیرون ملک تعلیم اور روزگار کے مواقع مزید محدود کر دیے ہیں۔