اسسٹنٹ سیکریٹری بیورو آف ساؤتھ اینڈ سینٹرل ایشیئن افیئرز ایس پال کپور نے پاکستان کو خطے میں ایک اہم شراکت دار قرار دیتے ہوئے کہا ہے کہ انسدادِ دہشت گردی اور باہمی تجارت کے فروغ میں پاکستان کا کردار قابلِ تحسین ہے۔
انہوں نے کہا کہ امریکا اور پاکستان کے درمیان معدنی وسائل کے شعبے میں تعاون اور شراکت داری مسلسل فروغ پا رہی ہے، جبکہ توانائی اور زراعت کے شعبوں میں دوطرفہ تجارت بھی تیزی سے آگے بڑھ رہی ہے۔ ان کا کہنا تھا کہ دونوں ممالک کے درمیان اقتصادی روابط مزید مضبوط ہو رہے ہیں، جس سے خطے میں استحکام کو تقویت ملے گی۔
معاون امریکی وزیر خارجہ کے مطابق انسدادِ دہشت گردی کے شعبے میں تعاون پاکستان کو داخلی اور سرحد پار سیکیورٹی خطرات سے مؤثر طور پر نمٹنے میں مدد فراہم کر رہا ہے، جو علاقائی امن کے لیے نہایت اہم ہے۔
اس سے قبل امریکی صدر ڈونلڈ ٹرمپ اور دیگر اہم امریکی ریاستی عہدیدار بھی دہشت گردی کے خلاف پاکستان کے مؤثر کردار کا اعتراف کرچکے ہیں۔