کراچی کے جناح انٹرنیشنل ایئرپورٹ کے مرکزی رن وے کی ازسرِ نو تعمیر مکمل ہونے کے بعد اس کا باقاعدہ افتتاح کر دیا گیا۔
افتتاحی تقریب میں سیکرٹری دفاع لیفٹیننٹ جنرل (ر) محمد علی نے ربن کاٹ کر نئے تعمیر شدہ رن وے کا افتتاح کیا۔ اس موقع پر ڈائریکٹر جنرل پاکستان ایئر پورٹس اتھارٹی ائیر وائس مارشل ذیشان سعید نے مہمانِ خصوصی اور ایڈیشنل سیکرٹری دفاع میجر جنرل قیصر سلیمان کا ہیڈکوارٹرز آمد پر استقبال کیا اور منصوبے پر تفصیلی بریفنگ دی۔
پاکستان ایئرپورٹس اتھارٹی کے مطابق مین رن وے کو 18 ماہ کی مدت میں بغیر کسی تاخیر اور اضافی لاگت کے مکمل کیا گیا۔ سیکرٹری دفاع نے عالمی معیار کے مطابق کوڈ 4F رن وے کی تعمیر کو سراہتے ہوئے ادارے کی پیشہ ورانہ کارکردگی کی تعریف کی۔
اتھارٹی کے مطابق رن وے 07L/25R کو جدید تقاضوں کے مطابق اپ گریڈ کیا گیا ہے، جس کے بعد اب بڑے طیارے بشمول ایئر بس کے A380 بھی یہاں لینڈ کر سکیں گے۔ نئے تعمیر شدہ رن وے پر پہلی کمرشل پرواز 19 فروری کو لینڈ کرے گی۔
تقریب کے اختتام پر یادگاری شیلڈز کا تبادلہ بھی کیا گیا۔ مہمانِ خصوصی نے ڈی جی پاکستان ایئرپورٹس اتھارٹی ذیشان سعید کو اعزازی شیلڈ پیش کی جبکہ دیگر افسران میں ڈپٹی ڈائریکٹر جنرل سمیر سعید، ڈائریکٹر پلاننگ اینڈ ڈویلپمنٹ غلام عباس شیخ، ائیرپورٹ مینیجر عدنان خان اور پروجیکٹ ڈائریکٹر زاہد اسحاق شامل تھے۔