مسجد الحرام کے مطاف کا سنگ مرمر شدید دھوپ اور بلند درجہ حرارت کے باوجود حیرت انگیز طور پر ٹھنڈا رہتا ہے جس سے لاکھوں زائرین کو طواف کے دوران آرام دہ ماحول میسر آتا ہے۔
سعودی گزٹ کے مطابق مطاف میں استعمال ہونے والا سنگ مرمر عام پتھر نہیں بلکہ خصوصی معیار کا قدرتی ماربل ہے جو سرد پہاڑی علاقوں سے حاصل کیا گیا ہے۔ اس سنگ مرمر کی نمایاں خصوصیت یہ ہے کہ یہ حرارت کو جذب کرنے کے بجائے زیادہ تر واپس منعکس کرتا ہے جبکہ ہلکے رنگ کی وجہ سے سطح کا درجہ حرارت معتدل رہتا ہے۔
ماہرین کا کہنا ہے کہ صرف مواد ہی نہیں بلکہ جدید انجینئرنگ ڈیزائن بھی ٹھنڈک برقرار رکھنے میں اہم کردار ادا کرتا ہے۔ سنگ مرمر کی سلیبیں مخصوص موٹائی کے ساتھ رکھی گئی ہیں اور تنصیب کے دوران ہوا کے خالی خلا شامل کیے گئے ہیں جو ہوا کی گردش کو ممکن بناتے ہیں اور گرمی کو تیزی سے خارج کرتے ہیں۔
نتیجتاً مسجد الحرام کے مطاف میں طواف کرنے والے زائرین انتہائی گرم موسم میں بھی نسبتاً ٹھنڈک اور آرام محسوس کرتے ہیں جو جدید ڈیزائن اور قدرتی مواد کے مربوط امتزاج کا ثبوت ہے۔