سیکیورٹی ذرائع کے مطابق پاکستان نے گزشتہ رات افغانستان میں انٹیلی جنس بنیادوں پر فضائی کارروائیاں کرتے ہوئے فتنہ الخوارج اور کالعدم تحریک طالبان پاکستان (ٹی ٹی پی) کے 7 اہم مراکز کو تباہ کر دیا۔
ذرائع کے مطابق یہ کارروائیاں افغان صوبوں ننگرہار، پکتیکا اور خوست میں کی گئیں، جہاں دہشتگردوں کے ٹھکانوں کو نشانہ بنایا گیا۔ کارروائی کے نتیجے میں 80 سے زائد خوارج کے ہلاک ہونے کی اطلاعات موصول ہوئی ہیں۔
سیکیورٹی ذرائع کا کہنا ہے کہ تباہ کیے گئے مراکز میں ننگرہار میں قائم متعدد نئے مراکز، مولوی عباس کا مرکز خوست میں، اسلام مرکز ننگرہار میں، ابراہیم مرکز ننگرہار میں جبکہ پکتیکا میں ملا راہبر اور مخلص یار کے مراکز شامل ہیں۔
ذرائع کے مطابق کارروائی کا مقصد پاکستان میں دہشتگردی کی منصوبہ بندی کرنے والے عناصر کو نشانہ بنانا اور سرحد پار محفوظ پناہ گاہوں کو ختم کرنا تھا۔