امریکا کے شمال مشرقی علاقوں میں شدید برفانی طوفان نے نظامِ زندگی مفلوج کر کے رکھ دیا، ہزاروں پروازیں منسوخ کر دی گئیں جبکہ متعدد ریاستوں میں ہنگامی حالت نافذ کر دی گئی ہے۔
غیر ملکی میڈیا رپورٹس کے مطابق شمال مشرقی امریکا کے مختلف علاقے شدید برفباری اور تیز ہواؤں کی لپیٹ میں ہیں، جس کے باعث تقریباً 5 کروڑ 40 لاکھ افراد کے لیے الرٹ جاری کیا گیا ہے۔
حکام کے مطابق 6 ریاستوں میں ایمرجنسی نافذ کی گئی ہے جن میں نیویارک، نیوجرسی، ڈیلاویئر،رہوڈ آئی لینڈ، کنیٹی کٹ اور میساچوسٹس شامل ہیں۔
برفانی طوفان کے باعث امریکا بھر میں 11 ہزار سے زائد پروازیں منسوخ ہو چکی ہیں جبکہ سیکڑوں پروازیں تاخیر کا شکار ہیں۔ فیڈرل ایوی ایشن ایڈمنسٹریشن نے نیویارک کے ایئرپورٹس پر گراؤنڈ اسٹاپ کی وارننگ جاری کر دی ہے۔
ادھر نیو یارک سٹی میں آج رات 9 بجے سے دوپہر 12 بجے تک غیر ضروری سفر پر پابندی عائد کر دی گئی ہے جبکہ میئر نے شہر بھر میں اسکول بند رکھنے کا حکم دے دیا ہے۔
رپورٹس کے مطابق نیویارک سٹی میں 18 سے 24 انچ جبکہ بعض علاقوں میں 28 انچ تک برفباری کا امکان ظاہر کیا گیا ہے۔ ماہرین موسمیات نے پیر کی صبح تک شدید برفباری اور تیز ہواؤں کی پیشگوئی کی ہے۔