حکومتِ پاکستان نے خواتین کی آزاد قانونی شناخت کو تسلیم کرتے ہوئے پاسپورٹ کے اجرا کے نظام میں اہم اصلاحات متعارف کرا دی ہیں جن کے تحت اب شادی شدہ خواتین اپنی مرضی سے اپنے والد کا نام پاسپورٹ پر درج کرا سکیں گی۔
ڈائریکٹوریٹ جنرل آف امیگریشن اینڈ پاسپورٹس کے اعلان کے مطابق یہ اقدام خواتین کے قانونی اور شہری حقوق کو مضبوط بنانے کی جانب ایک اہم پیش رفت ہے، جس سے انہیں سرکاری دستاویزات میں اپنی شناخت برقرار رکھنے کا اختیار حاصل ہوگا۔
یہ اصلاحات لاہور ہائی کورٹ کے معزز جج جسٹس عاصم حفیظ کے فیصلے کی روشنی میں کی گئی ہیں۔ یعدالت نے اپنے حکم میں قرار دیا تھا کہ خواتین کو اختیار دیا جائے کہ وہ اپنے قومی شناختی کارڈ اور پاسپورٹ پر والد کا نام برقرار رکھ سکیں۔
عدالتی احکامات پر عمل درآمد کے لیے ڈائریکٹوریٹ جنرل آف امیگریشن اینڈ پاسپورٹس نے متعلقہ اداروں سے مشاورت کا عمل شروع کیا۔ فیصلے کے بعد جمشید ایم قاضی، کنٹری ریپریزنٹیٹو یو این ویمن پاکستان اپنی ٹیم کے ہمراہ ڈی جی آئی پی سے ملاقات کے لیے پہنچے اور اصلاحات کے نفاذ میں مکمل تعاون کی یقین دہانی کرائی۔
حکام کا کہنا ہے کہ قانونی شناخت اور سرکاری دستاویزات تک رسائی خواتین کی معاشی، سماجی اور شہری زندگی میں مؤثر اور مکمل شرکت کے لیے بنیادی اہمیت رکھتی ہے، اور یہ اقدام خواتین کے حقوق کے تحفظ کی جانب ایک اہم سنگ میل ثابت ہوگا۔