اسلام آباد ہائی کورٹ نے جمعرات کو عمران خان اور ان کی اہلیہ بشریٰ بی بی کی توشہ خانہ II کیس میں سزا کے خلاف دائر اپیلوں پر سماعت کے لیے رجسٹرار آفس کو نمبر لگانے اور کارروائی آگے بڑھانے کی ہدایت کر دی۔
عدالت نے رجسٹرار آفس کی جانب سے اپیلوں پر عائد انتظامی اور تکنیکی اعتراضات کو ختم کرتے ہوئے واضح کیا کہ اپیلیں باقاعدہ کارروائی کے لیے آگے بڑھائی جائیں۔ اس سے قبل ڈائری برانچ کی جانب سے تکنیکی وجوہات کی بنیاد پر اپیلوں کو مقرر نہیں کیا جا سکا تھا جس کے باعث کیس میں کارروائی تعطل کا شکار تھی۔
اسلام آباد ہائی کورٹ کے حالیہ حکم کے بعد بانی پی ٹی آئی اور بشریٰ بی بی کی اپیلوں پر باقاعدہ سماعت کے لیے راہ ہموار ہو گئی ہے جسے کیس میں ایک اہم پیش رفت قرار دیا جا رہا ہے۔ ماہرین کے مطابق اب کیس کی آئندہ کارروائی جلد شروع ہونے کا امکان ہے ۔