اقوام متحدہ کے سیکریٹری جنرل انتونیو گوٹریس نے خبردار کیا ہے کہ موجودہ حالات میں جوہری ہتھیاروں کے استعمال کا خطرہ گزشتہ کئی دہائیوں کے مقابلے میں سب سے زیادہ ہوچکا ہے۔
اپنے بیان میں سیکریٹری جنرل کا کہنا تھا کہ دنیا میں امن کو سنگین خطرات لاحق ہیں اور عالمی رہنماؤں کو کشیدگی کم کرنے کے لیے فوری اقدامات کرنے کی ضرورت ہے۔ انہوں نے کہا کہ بڑھتا ہوا عالمی تناؤ نہ صرف سیکیورٹی خدشات کو بڑھا رہا ہے بلکہ اس کے باعث دنیا بھر میں فوجی اخراجات میں بھی اضافہ ہو رہا ہے۔
انتونیو گوٹریس کے مطابق جدید ٹیکنالوجی جنگی تنازعات کو مزید مہلک اور خطرناک بنا رہی ہے، جس سے عالمی امن کو مزید خطرات لاحق ہو سکتے ہیں۔
دوسری جانب اقوام متحدہ نے عالمی توانائی کی سپلائی متاثر ہونے پر بھی تشویش کا اظہار کیا ہے۔ اقوام متحدہ کے ترجمان اسٹیفن دوجارک کا کہنا ہے کہ تیل اور گیس کی قیمتوں میں اضافے کے اثرات براہ راست عالمی معیشت اور روزمرہ اشیاء کی قیمتوں پر پڑتے ہیں۔