ایرانی صدر مسعود پزشکیان نے واضح کیا ہے کہ ایران پڑوسی ممالک پر حملہ یا میزائل حملے نہیں کرے گا، جب تک کہ ان ممالک کی سرزمین سے ایران پر کوئی خطرہ یا حملہ نہ کیا جائے۔ انہوں نے علاقائی ممالک کے ساتھ دوستانہ تعلقات برقرار رکھنے کا اعادہ کرتے ہوئے معذرت کا اظہار بھی کیا۔
ایران کے صدر مسعود پزشکیان نے ایک بیان میں کہا کہ عبوری لیڈر شپ کونسل نے فیصلہ کیا ہے کہ پڑوسی ممالک کے خلاف کوئی حملہ یا میزائل حملہ نہیں کیا جائے گا۔ صدر نے کہا کہ ایران کسی بھی پڑوسی ملک سے دشمنی نہیں رکھتا اور علاقائی امن و سلامتی کے لیے تعاون جاری رکھے گا۔
گذشتہ روز صدر پزشکیان نے یہ بھی کہا تھا کہ موجودہ تنازعات کے خاتمے کے لیے ثالثی کی کوششیں اُن ممالک کی جانب سے ہونی چاہئیں جنہوں نے اس تنازع کو جنم دیا۔ انہوں نے سماجی رابطے کی ویب سائٹ ایکس پر اپنے بیان میں بتایا کہ کچھ ممالک نے ثالثی کے اقدامات شروع کر دیے ہیں۔
صدر مسعود پزشکیان نے مزید کہا کہ ایران خطے میں امن کے لیے سنجیدہ ہے، لیکن ملک کی خودمختاری اور وقار کے دفاع میں کسی بھی قسم کی ہچکچاہٹ نہیں دکھائی جائے گی۔