ایران کے صدر نے کہا ہے کہ ایران کی جانب سے پڑوسی ممالک کے خلاف کسی قسم کا حملہ یا میزائل حملے نہیں کیے جائیں گے۔
ایک بیان میں ایرانی صدر نے کہا کہ گزشتہ دنوں ہونے والے حملوں کے معاملے پر وہ پڑوسی ممالک سے معذرت خواہ ہیں اور ایران کا دوسرے ممالک پر حملہ کرنے کا کوئی ارادہ نہیں ہے۔
مسعود پزشکیان کے مطابق عبوری لیڈر شپ کونسل نے بھی اس بات کی منظوری دے دی ہے کہ پڑوسی ممالک کے خلاف کوئی حملہ یا میزائل حملہ نہیں کیا جائے گا۔ انہوں نے واضح کیا کہ جب تک کسی ملک کی سرزمین سے ایران پر حملہ نہیں کیا جاتا ایران بھی اس کے خلاف کوئی کارروائی نہیں کرے گا۔
ایرانی صدر کا کہنا تھا کہ ایران امریکا اور اسرائیل کے سامنے سرنڈر نہیں کرے گا اور دشمن کو ایرانی عوام کے ہتھیار ڈالنے کی خواہش کو ہمیشہ کے لیے دفن کرنا پڑے گا۔
واضح رہے کہ ایران پر امریکی اور اسرائیلی حملوں کے بعد ایران کی جانب سے پڑوسی ممالک میں قائم امریکی فوجی اڈوں کو نشانہ بنایا گیا تھا جس کے باعث متعدد شہری بھی زخمی ہوئے تھے۔