امریکی صدر ڈونلڈ ٹرمپ کی جانب سے ایران کے خلاف جنگ جلد ختم ہونے کے اعلان کے بعد عالمی منڈی میں خام تیل کی قیمتوں میں نمایاں کمی ریکارڈ کی گئی ہے۔
میڈیا رپورٹس کے مطابق صدر ٹرمپ کے بیان کے بعد عالمی مارکیٹ میں خام تیل کی قیمتیں تقریباً 8 فیصد تک گر گئیں۔ برطانوی خام تیل کی قیمت 8 فیصد کمی کے بعد 90 ڈالر فی بیرل تک آ گئی جبکہ دورانِ ٹریڈنگ امریکی خام تیل کی قیمت بھی 89 ڈالر سے کم ہو کر تقریباً 87 ڈالر فی بیرل تک پہنچ گئی۔
امریکی ٹی وی چینل کو انٹرویو دیتے ہوئے صدر ٹرمپ نے کہا کہ ان کے خیال میں ایران کے خلاف جنگ بڑی حد تک مکمل ہو چکی ہے اور اس کے خاتمے کے امکانات قریب ہیں۔
اس سے قبل ری پبلکن کانفرنس سے خطاب میں بھی انہوں نے تیل سے متعلق کچھ پابندیاں ختم کرنے کا اعلان کیا تھا تاکہ عالمی منڈی میں قیمتوں کو کم کیا جا سکے۔
واضح رہے کہ گزشتہ روز دورانِ کاروبار خام تیل کی قیمت 119 ڈالر فی بیرل سے تجاوز کر گئی تھی، جس کے بعد جی7 ممالک نے ہنگامی تیل کے ذخائر استعمال کرنے کا عندیہ دیا تھا جس سے قیمتوں میں کچھ کمی آئی۔