پاک فوج کے شعبہ تعلقات عامہ آئی ایس پی آر کے مطابق چیف آف آرمی اسٹاف و چیئرمین جوائنٹ چیفس آف اسٹاف کمیٹی فیلڈ مارشل سید عاصم منیر، چیف آف نیول اسٹاف ایڈمرل نوید اشرف اور چیف آف ایئر اسٹاف ایئر چیف مارشل ظہیر احمد بابر سدھو نے مسلح افواج پاکستان کی جانب سے قوم کو دل کی گہرائیوں سے عیدالفطر کی مبارکباد پیش کی ہے۔
اپنے مشترکہ پیغام میں مسلح افواج کے سربراہان نے کہا کہ عیدالفطر اتحاد، ہمدردی اور شکرگزاری جیسی اعلیٰ اقدار کی عکاسی کرتی ہے۔ ان کا کہنا تھا کہ پاک افواج کے لیے عید کی اصل روح مادرِ وطن کی خدمت اور دفاع میں پوشیدہ ہے، جہاں جوان اپنے اہلِ خانہ سے دور رہ کر ملک کے امن و استحکام کو یقینی بناتے ہیں۔
انہوں نے وطن کے دفاع پر مامور بہادر مردوں اور خواتین کی جرات و قربانیوں کو خراجِ تحسین پیش کیا اور ان کے اہلِ خانہ کے عزم و حوصلے کو بھی سراہا۔
مسلح افواج کے سربراہان نے دعا کی کہ یہ عید پاکستان اور امت مسلمہ کے لیے امن، خوشحالی اور برکتوں کا باعث بنے۔