صدرِ مملکت آصف علی زرداری سے نوڈیرو میں وفاقی وزراء کی اہم ملاقات ہوئی جس میں ملک کی سیکیورٹی اور معاشی صورتحال پر تفصیلی تبادلہ خیال کیا گیا۔
ملاقات میں وفاقی وزیرِ داخلہ محسن نقوی، وفاقی وزیرِ خزانہ محمد اورنگزیب اور وفاقی وزیرِ پیٹرولیم علی پرویز ملک شریک ہوئے۔ اس موقع پر بلاول بھٹو زرداری، وزیرِ اعلیٰ سندھ مراد علی شاہ، فریال تالپور اور صوبائی وزیر ناصر حسین شاہ بھی موجود تھے۔
اجلاس میں ملک میں امن و امان کی صورتحال، مجموعی معاشی حالات، توانائی کے شعبے اور پیٹرولیم مصنوعات کی قیمتوں کے اثرات کا تفصیلی جائزہ لیا گیا۔
وفاقی وزیرِ داخلہ محسن نقوی نے صدرِ مملکت کو دہشت گردی کے خلاف جاری کارروائیوں، سرحدی سلامتی اور پاک افغان سرحد پر کشیدگی سے متعلق بریفنگ دی جبکہ علاقائی سکیورٹی چیلنجز پر بھی غور کیا گیا۔
اس موقع پر وزیرِ خزانہ محمد اورنگزیب اور وزیرِ پیٹرولیم علی پرویز ملک نے معاشی اشاریوں، توانائی کے شعبے اور پیٹرولیم قیمتوں میں اضافے کے تناظر میں حکومتی اقدامات سے آگاہ کیا۔
صدر آصف علی زرداری نے ہدایت کی کہ موجودہ علاقائی صورتحال کے پیش نظر معاشی پالیسیوں میں عوامی ریلیف کو ترجیح دی جائے اور پیٹرولیم مصنوعات کی قیمتوں کا بوجھ کم سے کم رکھا جائے تاکہ عام آدمی کو زیادہ سے زیادہ سہولت فراہم کی جا سکے۔