چیف سیکریٹری سندھ آصف حیدر شاہ کی زیر صدارت متوقع بارشوں کے پیش نظر اہم اجلاس میں تمام انتظامیہ کو ہائی الرٹ رہنے کا حکم دے دیا گیا۔
اجلاس میں تمام کمشنرز، ڈپٹی کمشنرز اور اسسٹنٹ کمشنرز نے شرکت کی، تمام کمشنرز، ڈپٹی کمشنرز اور اسسٹنٹ کمشنرز کو آئندہ 7 دن فیلڈ میں موجود رہنے کی ہدایت کی گئی ہے۔
آصف حیدر شاہ نے کہا کہ محکمہ موسمیات نے بارش کے نئے اسپیل کی پیشگوئی کر دی ہے، پی ڈی ایم اے کو فوری ایڈوائزری جاری کرنے کی ہدایت کی گئی۔
چیف سیکریٹری سندھ نے ضلعی انتظامیہ اور بلدیاتی اداروں کو مکمل متحرک ہو کر فیلڈ میں نکلنے کا حکم دیا اور نکاسی آب کے لیے تمام ضروری مشینری کی دستیابی اور فعالیت یقینی بنانے، ٹریفک کی روانی برقرار رکھنے کے لیے متعلقہ اداروں کو ہنگامی اقدامات کی ہدایت کی۔
بارش اور تیز ہواؤں کے پیش نظر خطرناک بل بورڈز کے خلاف فوری کارروائی کا حکم دینے کے ساتھ عوام کو ممکنہ صورتحال سے آگاہ کرنے کے لیے مؤثر آگاہی مہم چلانے اور تمام اداروں کو پیشگی اقدامات مکمل کرکے مکمل تیاری یقینی بنانے کی ہدایت کی۔