وفاقی وزیر منصوبہ بندی احسن اقبال نے کہا ہے کہ عاصم منیر بھرپور عسکری حکمت عملی کے ساتھ ملکی سرحدوں کا دفاع کر رہے ہیں اور دشمن کو مؤثر جواب دیا جا رہا ہے۔
جدہ میں یومِ پاکستان کی تقریب سے خطاب کرتے ہوئے وفاقی وزیر منصوبہ بندی کا کہنا تھا کہ معرکۂ حق میں پاکستان نے دشمن کے 11 جہاز گرائے جو مسلح افواج کی پیشہ ورانہ صلاحیتوں کا منہ بولتا ثبوت ہے۔
انہوں نے کہا کہ فیلڈ مارشل عاصم منیر کی قیادت میں پاک فوج پوری طاقت کے ساتھ سرحدوں کی حفاظت کر رہی ہے اور ہر جارحیت کا بھرپور جواب دیا جا رہا ہے۔
احسن اقبال کا کہنا تھا کہ پاکستانی جوان وطن کے دفاع کے لیے اپنی جانوں کا نذرانہ پیش کر رہے ہیں جو پوری قوم کے لیے باعث فخر ہے۔
انہوں نے مزید کہا کہ شہباز شریف کی قیادت میں اڑان پاکستان ایجنڈے پر دوبارہ کام شروع کر دیا گیا ہے جبکہ سمندر پار پاکستانی بھی ملکی ترقی میں اپنا کردار ادا کر رہے ہیں۔