حکومت نے کفایت شعاری اقدامات پر سختی سے عملدرآمد جاری رکھنے کا فیصلہ کیا ہے۔ یہ فیصلہ نائب وزیراعظم و وزیر خارجہ سینیٹر اسحاق ڈار کی زیر صدارت منعقدہ کفایت شعاری اقدامات کی نگرانی و عملدرآمد کمیٹی کے اجلاس میں کیا گیا۔
اجلاس میں موجودہ معاشی صورتحال کے پیش نظر مالی نظم و ضبط کو یقینی بنانے کے لیے جاری اقدامات کا تفصیلی جائزہ لیا گیا۔ وفاقی وزارتوں اور صوبوں میں پہلے سے منظور شدہ کفایت شعاری اقدامات پر عملدرآمد کی موجودہ صورتحال کا جائزہ بھی اجلاس میں لیا گیا۔
نائب وزیراعظم نے غیر ضروری اخراجات میں کمی اور وسائل کے مؤثر استعمال کے حوالے سے اب تک کی پیش رفت پر اطمینان کا اظہار کرتے ہوئے متعلقہ وزارتوں اور اداروں کو ہدایت کی کہ مانیٹرنگ نظام کو مزید مؤثر بنایا جائے اور جاری ہدایات پر سختی سے عملدرآمد یقینی بنایا جائے۔ انہوں نے زور دیا کہ مالی نظم و ضبط ہر سطح پر برقرار رکھا جائے۔
اجلاس میں وفاقی وزرائے خزانہ، پیٹرولیم، آئی ٹی، اقتصادی امور اور اطلاعات نے شرکت کی جبکہ ایس اے پی ایم طارق باجوہ، آئی ٹی اور پیٹرولیم کے وفاقی سیکریٹریز، صوبوں کے چیف سیکریٹریز اور دیگر اعلیٰ حکام بھی موجود تھے۔