بڑھتی ہوئی تیل کی قیمتوں کے پیشِ نظر حکومت نے ٹارگٹڈ سبسڈی نظام متعارف کرانے کا فیصلہ کر لیا ہے، جس کے تحت ریلیف صرف مستحق اور ضرورت مند طبقات کو فراہم کیا جائے گا۔
یہ فیصلہ وفاقی وزیر خزانہ محمد اورنگزیب کی زیر صدارت ہونے والے ایک اہم اجلاس میں کیا گیا جس میں مشرق وسطیٰ کی کشیدہ صورتحال کے باعث پیٹرولیم مصنوعات کی قیمتوں اور ملکی حالات کا تفصیلی جائزہ لیا گیا۔
وزارت خزانہ کے مطابق اجلاس میں ڈیٹا پر مبنی فیصلوں، شفافیت اور وفاق و صوبوں کے درمیان بہتر تعاون پر زور دیا گیا۔ اس بات پر بھی اتفاق کیا گیا کہ پیٹرولیم مصنوعات سے متعلق پالیسی فیصلے زمینی حقائق کو مدنظر رکھتے ہوئے کیے جائیں گے۔
اجلاس کے شرکاء کو بریفنگ میں بتایا گیا کہ ملک میں پیٹرولیم مصنوعات کی فراہمی مستحکم ہے اور وافر ذخائر موجود ہیں، جس کے باعث کسی فوری قلت کا خدشہ نہیں۔
صوبائی نمائندوں نے پیٹرول کی بچت کے لیے طرزِ زندگی میں تبدیلی کی ضرورت پر زور دیا، جبکہ خیبرپختونخوا کی جانب سے بتایا گیا کہ صوبے میں تیل سپلائی مینجمنٹ دیگر علاقوں کے مقابلے میں بہتر ہے۔
بریفنگ میں یہ بھی واضح کیا گیا کہ حکومت کے پاس مالی گنجائش محدود ہے، اس لیے موجودہ حالات میں محتاط اور متوازن فیصلوں کی ضرورت ہے۔
حکومتی ذرائع کے مطابق مجوزہ ٹارگٹڈ سبسڈی سسٹم کا مقصد یہ ہے کہ ریلیف براہِ راست مستحق افراد تک پہنچایا جائے تاکہ مالی دباؤ کم رکھتے ہوئے عوام کو سہولت فراہم کی جا سکے۔