ضلعی انتظامیہ نے کراچی کے مصروف ترین تجارتی مرکز ہاشو سینٹر کی سینکڑوں دکانیں اور بہادر آباد میں قرطبہ مارکیٹ سیل کردی۔
انتظامیہ نے فائر سیفٹی اقدامات کی عدم موجودگی اور حفاظتی ضوابط پر عمل درآمد نہ کرنے پر کارروائی کرتے ہوئے سینٹر کی پہلی منزل پر واقع 200 دکانوں کو سیل کردیا ہے۔
انتظامیہ کے مطابق یہ قدم ہاشو سینٹر میں فائر سیفٹی کے ناقص انتظامات اور متعلقہ اداروں کی جانب سے دی گئی ہدایات پر عمل نہ کرنے کے باعث اٹھایا گیا ہے۔
ضلعی حکام کا کہنا ہے کہ تجارتی مراکز میں آگ لگنے کے ممکنہ خطرات کے پیش نظر انسانی جانوں اور مال کے تحفظ کو یقینی بنانا اولین ترجیح ہے، اور جب تک حفاظتی اقدامات مکمل نہیں کیے جاتے دکانیں بند رہیں گی۔
دوسری جانب اسسٹنٹ کمشنر جمشید کوارٹرز بلال علوی اور ڈائریکٹر اینٹی اینکروچمنٹ نے مشترکہ کارروائی کرتے ہوئے بہادرآباد میں قرطبہ مارکیٹ سیل کردی۔
حکام کے مطابق مذکورہ کارروائی بھی فائر سیفٹی کی خلاف ورزی کرنے پر عمل میں لائی گئی۔