ایران-اسرائیل تنازعے کا ایک وسیع تر علاقائی کشمکش میں بدلنا کسی بھی ملک کے مفاد میں نہیں ہے۔ یہ اب ایک مقامی تنازعہ نہیں رہا، بلکہ ایک عالمی اقتصادی اور سیکیورٹی خطرہ بن چکا ہے۔ تیل کی بڑھتی قیمتوں سے لے کر عالمی منڈیوں میں عدم استحکام اور آبنائے ہرمز جیسے اہم تجارتی راستوں میں رکاوٹ کے خدشات تک، اس کے نتائج صرف مشرق وسطیٰ تک محدود نہیں رہیں گے بلکہ پوری دنیا کو متاثر کریں گے۔
واضح رہے کہ ایران نے اس تنازعے کی شروعات نہیں کی، اور ایک خودمختار ریاست ہونے کے ناطے اسے اپنا دفاع کرنے کا حق حاصل ہے۔ تاہم، جواب دینے کا طریقہ اور سمت اہمیت رکھتی ہے۔ اسٹریٹجک تحمل ہی دفاعی پوزیشن اور لاپرواہ کشیدگی کے درمیان فرق کرتا ہے۔ ہم تیزی سے ایک خطرناک پھیلاؤ دیکھ رہے ہیں، جہاں سعودی عرب، قطر اور متحدہ عرب امارات جیسے غیر جنگجو خلیجی ممالک، جنہوں نے خود کو اس تنازعے سے واضح طور پر دور رکھا تھا، اب خطرے کی زد میں آ رہے ہیں۔ یہ حکمت عملی نہیں، بلکہ اسٹریٹجک حد سے تجاوز ہے۔
کلیدی سوال یہ نہیں ہے کہ جنگ کیسے شروع ہوئی، بلکہ یہ ہے کہ یہ کیسے ختم ہوگی اور اس کی قیمت کیا ہوگی؟ اگر ایران ایسے راستے پر گامزن رہتا ہے جو علاقائی خلیج کو مزید گہرا کرتا ہے، تو وہ ان ممالک سے دوری اختیار کرلینے کا خطرہ مول لے گا جو تاریخی طور پر اس کی اقتصادی لائف لائن (زندگی کی ڈور) بنے رہے ہیں۔ متحدہ عرب امارات میں تقریباً پانچ لاکھ ایرانی مقیم ہیں جو ایران کی معیشت میں اہم کردار ادا کرتے ہیں۔ قطر اور دیگر ممالک نے پابندیوں کے دور میں ثالثی کا کردار ادا کیا ہے۔ ان ریاستوں کو ہدف بنانا یا الگ تھلگ کرنا طاقت نہیں، بلکہ خود کو پہنچایا جانے والا نقصان ہے۔
عالمی پہلو بھی اتنا ہی اہم ہے۔ آبنائے ہرمز میں کوئی بھی رکاوٹ صرف ایک ملک کے لیے دھچکا نہیں، بلکہ پوری عالمی معیشت کے لیے ایک جھٹکا ہے۔ تیل کی قیمتوں میں اضافہ، سپلائی چین کا ٹوٹنا، اور یورپ سے لے کر ایشیا تک کی معیشتوں کا متاثر ہونا، یہ صرف امریکا کا مسئلہ نہیں، بلکہ پوری دنیا کا مسئلہ ہے۔
اس لیے پاکستان کا موقف جذبات پر نہیں، حقیقت پسندی پر مبنی ہے۔ اگرچہ عوامی جذبات ایران کے حق میں ہو سکتے ہیں، لیکن ریاستی پالیسی جذبات کے تابع نہیں ہو سکتی۔ پاکستان کی واضح اسٹریٹجک حدود ہیں۔ ہم سفارتی، اخلاقی اور انسانی بنیادوں پر حمایت تو کر سکتے ہیں، لیکن ہم ایسی حدود عبور نہیں کر سکتے جو ہماری قومی سلامتی، معاشی استحکام اور علاقائی توازن کو خطرے میں ڈالیں۔ ہر ریاست اپنی 'سرخ لکیروں' (Red Lines) کے اندر کام کرتی ہے، اور پاکستان اس سے مستثنیٰ نہیں ہے۔ ایران کو یہ تسلیم کرنا ہوگا کہ اس کے قریبی خیر خواہ بھی لا محدود کشیدگی کی حمایت نہیں کر سکتے۔
مزید برآں، حالیہ پیش رفت نے پاکستان کے لیے خود ایک سخت تنبیہ کا کام کیا ہے۔ آیت اللہ علی خامنہ ای کی مبینہ ہلاکت پر عوامی ردعمل نے یہ ظاہر کر دیا کہ بیرونی تنازعات کتنی تیزی سے داخلی عدم استحکام کو بھڑکا سکتے ہیں۔ گلگت بلتستان میں ہونے والا تشدد، سرکاری و نجی املاک کو جلانا، بے گناہ جانوں کا ضیاع اور ریاستی تنصیبات پر حملے صرف بدامنی نہیں تھے؛ یہ قومی سلامتی کے لیے ایک الارم تھے۔ اس نے اجاگر کیا کہ کس طرح غیر ملکی تنازعات کے جذباتی اثرات کو داخلی طور پر ہتھیار کے طور پر استعمال کیا جا سکتا ہے۔
یہی وجہ ہے کہ پاکستان کو ایک مضبوط لکیر کھینچنی ہوگی اور ہم ایسا کریں گے۔ ہم بیرونی تنازعات کو اپنے داخلی نظام کو غیر مستحکم کرنے کی اجازت نہیں دیں گے۔ نہ ہی ہم کسی ایسے بیانیے، گروہ یا کردار کو اجازت دیں گے کہ وہ ایسی صورتحال کا فائدہ اٹھا کر ریاست کی رٹ کو چیلنج کرے۔
سفارتی سطح پر، پاکستان، چین اور ترکی جیسے ممالک کے ساتھ مل کر، کشیدگی میں کمی کے لیے سرگرم عمل ہے۔ توجہ واضح ہے: تنازعے کے مزید علاقائی بننے کو روکنا، عالمی تجارتی راستوں کا تحفظ کرنا، اور تمام اسٹیک ہولڈرز کو مذاکرات کی میز پر لانا۔ جنگ بالآخر ختم ہو سکتی ہے، لیکن اصل سوال یہ ہے کہ کیا یہ استحکام کے ساتھ ختم ہوگی یا ایک ٹوٹے ہوئے، منقسم مشرق وسطیٰ کے ساتھ؟
بے لگام کشیدگی مزاحمت نہیں، خطرہ ہے۔ اسٹریٹجک صبر، نپا تلا جواب، اور علاقائی مفاہمت ہی پائیدار نتائج کے واحد راستے ہیں۔ ایران کو فیصلہ کرنا ہوگا کہ آیا وہ استحکام کے ساتھ بقا چاہتا ہے، یا تصادم کے ساتھ تنہائی۔