وزیراعظم شہباز شریف کی ہدایات پر ملک بھر میں ٹول پلازہ فیس میں سہ ماہی اضافہ معطل کر دیا گیا ہے۔
وفاقی وزیر مواصلات عبدالعلیم خان نے نیشنل ہائی وے اتھارٹی کو پہلے جاری نوٹیفکیشن واپس لینے کے احکامات جاری کر دیے اور اس ضمن میں نیا نوٹیفکیشن بھی جاری کر دیا گیا۔
عبدالعلیم خان کے مطابق 5 اپریل سے ٹول ٹیکس میں ہونے والا اضافہ اب نافذ نہیں ہوگا۔ انہوں نے کہا کہ موجودہ معاشی حالات میں شہریوں پر مزید بوجھ نہیں ڈالا جا سکتا اور پیٹرول و ڈیزل کی قیمتوں میں اضافے کے باعث عوام پہلے ہی مشکلات کا شکار ہیں۔
وفاقی وزیر نے مزید کہا کہ حکومت عوامی مشکلات کم کرنے کے لیے ہر ممکن اقدامات کر رہی ہے اور ملک کو درپیش مشکل حالات میں پوری قوم کو مل کر اس صورتحال کا مقابلہ کرنا ہوگا۔