وفاقی وزیر پیٹرولیم علی پرویز ملک نے کہا ہے کہ ملکی قیادت مارکیٹس جلد بند کرنے کی تجویز پر غور کر رہی ہے اور اگر یہ فیصلہ نافذ کیا گیا تو شادی ہالز اور ریسٹورنٹس کو رات 10 بجے تک کھلے رکھنے کی اجازت دی جائے گی۔
نجی ٹی وی پروگرام میں گفتگو کرتے ہوئے انہوں نے بتایا کہ وزیر خزانہ آئندہ ہفتے عالمی مالیاتی اداروں، آئی ایم ایف اور ورلڈ بینک، سے اہم ملاقاتوں کے لیے بیرونِ ملک روانہ ہوں گے۔ ان ملاقاتوں میں پاکستان کو درپیش ممکنہ بڑے معاشی چیلنجز سے آگاہ کیا جائے گا۔
علی پرویز ملک کا کہنا تھا کہ موجودہ صورتحال کے پیشِ نظر ملک کے معاشی فریم ورک کا ازسرِ نو جائزہ لینا ناگزیر ہو گیا ہے تاکہ ممکنہ دباؤ کا مؤثر انداز میں مقابلہ کیا جا سکے۔
انہوں نے مزید کہا کہ متحدہ عرب امارات نے مشکل وقت میں پاکستان کے لیے 3.5 ارب ڈالر کے ڈپازٹس رکھوائے تھے تاہم اگر یو اے ای اپنی رقم واپس لینے کا فیصلہ کرتا ہے تو حکومت نے اس حوالے سے پیشگی انتظامات کر رکھے ہیں۔
وفاقی وزیر کے مطابق قطر سے گیس سپلائی بند ہونے کے بعد فوری طور پر مقامی گیس فیلڈز سے 400 سے 500 ایم ایم سی ایف ڈی گیس کی فراہمی شروع کر دی گئی ہے تاکہ توانائی کی ضروریات کو پورا کیا جا سکے۔