وزیر خارجہ اسحاق ڈار نے ایرانی وزیر خارجہ عباس عراقچی کے بیان کا خیرمقدم کرتے ہوئے کہا ہے کہ وہ اپنے بھائی عباس عراقچی کی وضاحت کو سراہتے ہیں۔
واضح رہے کہ امریکی میڈیا نے دعویٰ کیا تھا کہ ایران نے مذاکرات کے لیے اسلام آباد آنے سے انکار کر دیا اور پاکستان کی کوششیں ناکام ہو گئی ہیں۔ اس خبر پر ردعمل دیتے ہوئے عباس عراقچی نے وضاحت کی کہ ایران نے مذاکرات کے لیے کبھی اسلام آباد آنے سے انکار نہیں کیا۔
عباس عراقچی نے سوشل میڈیا پلیٹ فارم ایکس پر ایرانی عوام کی پاکستان سے محبت کی ویڈیو شیئر کرتے ہوئے لکھا کہ ایران مذاکرات کے لیے ہمیشہ تیار رہا ہے۔ انہوں نے کہا کہ ایران پاکستان کی جنگ بندی کی کوششوں کی قدر کرتا ہے جبکہ امریکی میڈیا اس معاملے کو غلط انداز میں پیش کر رہا ہے۔
ایرانی وزیر خارجہ نے مزید کہا کہ ایران ان مذاکرات میں اس بات پر زور دیتا ہے کہ جنگ کا خاتمہ جامع اور دائمی ہونا چاہیے اور یہ کوئی عارضی یا نمائشی اقدام نہیں ہونا چاہیے۔