عالمی ادارہ صحت کی جانب سے خیرپور میں منکی پاکس کے بڑھتے کیسز کے پیشِ نظر ویکسین فراہم کرنے کی پیشکش کی گئی ہے، جہاں سے بیماری کے دیگر اضلاع تک پھیلنے کی اطلاعات بھی موصول ہورہی ہیں۔
حکام کے مطابق یہ ویکسین صرف مخصوص ہائی رسک گروپس اور ہیلتھ ورکرز کے لیے مختص ہوگی۔
اس صورتحال کے تناظر میں محکمہ صحت سندھ نے تمام اسپتالوں میں 24 گھنٹے معلوماتی ڈیسک قائم کرنے کے ساتھ ساتھ ریسکیو 1122 کے ذریعے فوری رابطہ اور ریفرل سسٹم کو یقینی بنانے کی ہدایت کی ہے۔
ڈی جی ہیلتھ سندھ نے اسپتالوں میں ایم پاکس رسپانس یونٹس کے قیام کا بھی حکم دیا ہے۔
واضح رہے کہ محکمہ صحت سندھ کے مطابق اب تک منکی پاکس کے باعث نوزائیدہ بچوں میں 7 اموات رپورٹ ہو چکی ہیں، جبکہ کراچی میں بھی رواں سال منکی پاکس کا پہلا کیس سامنے آ چکا ہے اور ملک میں اس بیماری کے ساتھ ایچ آئی وی سے متاثرہ ایک مریض کے جاں بحق ہونے کی بھی اطلاعات ہیں۔