حکومت سندھ کی جانب سے موٹر سائیکل سواروں کو دو ہزار روپے کی امدادی رقم دینے کے اعلان کے بعد، اس مقصد کے لیے بنائی گئی خصوصی ایپلیکیشن اور ویب سائٹ لانچ ہوتے ہی شدید دباؤ کا شکار ہوکر ڈاؤن ہوگئی ہے۔
محکمہ ایکسائز اینڈ ٹیکسیشن کے سسٹم پر ایک ہی وقت میں ہزاروں شہریوں کی جانب سے درخواستیں جمع کرانے کے لیے رسائی کے باعث تکنیکی خرابی پیدا ہوئی، جس سے ویب سائٹ اور ایپلیکیشن کا سرور بوجھ برداشت نہ کر سکا اور مکمل طور پر کریش ہوگیا۔
اس صورتحال کے نتیجے میں صوبہ بھر سے امدادی رقم کے حصول کے خواہشمند شہری اپنی درخواستیں جمع کرانے میں ناکام رہے ہیں۔
امدادی رقم کے اعلان کے بعد شہریوں کی بڑی تعداد نے ایک ساتھ آن لائن سسٹم کا رخ کیا، جس کی وجہ سے سسٹم بیٹھ گیا اور صارفین کو تکنیکی مشکلات کا سامنا کرنا پڑا۔
حکام کی جانب سے سسٹم کو بحال کرنے کی کوششیں جاری ہیں تاہم تکنیکی خرابی کے باعث شہریوں کو شدید پریشانی کا سامنا ہے۔