خیبر پختونخوا میں آج رات سے بارشوں کے نئے سلسلے کے آغاز کا امکان ظاہر کیا گیا ہے، جس کے باعث صوبے کے مختلف علاقوں میں سیلابی صورتحال پیدا ہونے کا خدشہ ہے۔
پی ڈی ایم اے نے ممکنہ سیلاب کے پیش نظر الرٹ جاری کرتے ہوئے متعلقہ اداروں کو ہنگامی اقدامات کی ہدایت کر دی ہے۔
الرٹ کے مطابق چترال، کوہستان اور سوات میں دریاؤں اور ندی نالوں میں طغیانی کا خطرہ ہے، جبکہ نشیبی علاقوں میں پانی جمع ہونے اور رابطہ سڑکیں متاثر ہونے کا بھی اندیشہ ظاہر کیا گیا ہے۔
پی ڈی ایم اے نے ضلعی انتظامیہ، ریسکیو اداروں اور متعلقہ محکموں کو الرٹ رہنے کی ہدایت کرتے ہوئے شہریوں سے بھی احتیاطی تدابیر اختیار کرنے کی اپیل کی ہے۔
حکام کے مطابق بارشوں کے دوران غیر ضروری سفر، پہاڑی اور دریا کنارے علاقوں میں جانے سے گریز کیا جائے تاکہ کسی بھی ممکنہ نقصان سے بچا جا سکے۔