پنشن سے محروم لیاری ڈیولپمنٹ اتھارٹی کے سابق ملازمین نے مطالبات کے حق میں کراچی پریس کلب پر احتجاج کیا۔
ایل ڈی اے کے تقریباً 88 پنشنرز، جن میں 12 بیوہ خواتین اور یتیم بچے بھی شامل ہیں، گزشتہ چار ماہ سے پنشن کی ادائیگی سے محروم ہیں۔
متاثرین کے مطابق متعلقہ افسران کی مبینہ بے حسی کے باعث وہ شدید مالی بحران کا شکار ہیں، جس کے نتیجے میں ان کے گھروں کے چولہے تک ٹھنڈے پڑ چکے ہیں۔
متاثرین کا کہنا ہے کہ رمضان المبارک کے مقدس مہینے اور عیدالفطر کے موقع پر وزیراعلیٰ سندھ کی واضح ہدایات کے باوجود بھی ان کے واجبات ادا نہیں کیے گئے، جس سے ان کی مشکلات میں مزید اضافہ ہوا ہے۔
پنشنرز نے مطالبہ کیا ہے کہ انہیں مزید مجبور نہ کیا جائے اور ان کے واجبات فوری طور پر ادا کیے جائیں تاکہ وہ باعزت زندگی بسر کر سکیں۔