وزیرِاعظم پاکستان محمد شہباز شریف نے دوحہ کے دورے کے دوران امیرِ قطر شیخ تمیم بن حمد آل ثانی سے امیری دیوان میں اہم ملاقات کی جو تقریباً ایک گھنٹے تک جاری رہی۔
اعلامیے کے مطابق ملاقات میں دونوں رہنماؤں نے خطے اور عالمی صورتحال پر تفصیلی تبادلہ خیال کیا خاص طور پر مشرقِ وسطیٰ میں جاری کشیدگی پر گفتگو کی گئی۔
امیرِ قطر نے وزیرِاعظم کا خیرمقدم کرتے ہوئے خطے میں کشیدگی کم کرنے کے لیے پاکستان کی سفارتی کوششوں کو سراہا جبکہ وزیراعظم شہباز شریف نے قطر اور دیگر خلیجی ممالک پر حملوں کی مذمت کرتے ہوئے مکمل یکجہتی کا اظہار کیا۔
ملاقات میں دونوں رہنماؤں نے خطے میں امن و استحکام، سفارتی روابط کے فروغ اور عالمی تعاون بڑھانے کی ضرورت پر زور دیا جبکہ توانائی کی سپلائی چینز کے تسلسل کو یقینی بنانے پر بھی اتفاق کیا گیا۔
اس موقع پر پاک-قطر دوطرفہ تعلقات، دفاع، توانائی اور سکیورٹی کے شعبوں میں تعاون بڑھانے کے امور بھی زیر بحث آئے۔بعد ازاں امیرِ قطر نے وزیرِاعظم اور ان کے وفد کے اعزاز میں ظہرانہ بھی دیا جس میں دونوں ممالک کے اعلیٰ حکام نے شرکت کی۔